“Erabaki
ahalmenak eta gizartea antolatzeko esparrua batzarreak izatea herritarrari burujabetza emanen lioke”
Baztango erakundetzearen inguruko gogoeta aspaldi abiatu
genuen Metazirin. Jendarte berdinzale eta aske bat eraikitzeko bidean baztango herrietako batzarreek eta Batzar Nagusiak erabilgarritasun handia dutelakoan gaude.
Gauzak horrela, Xabier Torresekin solastatu gara, Elizondoko Herriko zinpeko alkatearekin.
(15. Metaziri-n argitaratutako elkarrizketa)
1.- Gaur egun
batzarreek ze erabilgarritasun dute Baztanen? Nola ikusten duzu batzarreen
egoera? (konpetentziak, parte hartzea, alkateak izateko zailtasunak…)
Gaur egungo zenbait
erranen arabera, Batzarrearen (eta honen ordezkari den alkatearen) oinarrizko
ardurak dira, salbuespenak salbuespen, ospakizunen antolaketa, urak,
hilerriaren kudeaketa eta zerga batzuen kobrantza. Ordenantzek konpetentzia
hauek soilik aitortzen dizkiote batzarreei, urrunago joateko gonbitarik egin
gabe zaharkituak egotera kondenatzen dituzte, baina jendartearen eskaera, ez
munduko xoko hontan bakarrik, bertze bat da. Izatez, Herriko Batzarreak,
interes komunekoak diren gaien eztabaida gune bezala agertzen zaizkigu,
siglarik gabe politikan aritzeko gune ireki gisa, eta sortzen diren kezkak goitiago
dauden instantzietan jakinarazteko edo salatzeko erabili izan ditu baztango
herritarrak, gutienez azken 35 urteetan. Azkeneko adibideak ditugu
Foruzaingoaren Komisaldegiaren harira sorturiko mugimenduak Elizondoko
Batzarrera jo izana, Erdizeko auzia, Aroztegia… Hauek ezagunenak dira baina
badira bertze zenbait. Azken urteetan, batzarreetako asistentzia orohar eskasa
izan bada ere, herrien eta herritarren integritatea asaldatu duten gai hauek Batzarreak
biziberritu dituzte, jendea mugituarazi dute, batzartuarazi dute. Era berean,
azken urteetan Herriko Alkate berriak eta gazteak animatu direlako belaunaldi
aldaketa gauzatu da, eta tresna hau erabiliz (eta balorean jarriz) aldaketarako
grinaren txinparta ekarri dute. Batzarreak eta Herrietako Alkateak garrantzia
hartzen ari dira. Bide berean, Batzar Nagusiko kideen ordezkapena eman da eta
Ordenantzen berritze partziala kontuan hartzen badugu, pixkanaka-pixkanaka bertako
egitura administratiboa indartzera goazela dirudi… Edo asmoa existitzen dela
bederen!
Dena den, altxaferoak
botatzen hasi baino lehen, kontutan hartu behar dugu gaur egungo egoera
egituratzen duten faktoreak pisuzkoak direla…
2.- Zeintzuk dira,
hortaz, egungo egoera egituratzen duten faktoreak?
Azken urte luzeetan bertakoa dugun egitura
administratibo hau ahulduz joan da. Zuzenki eragin diote administrazio
lokalaren (udaletxearen) bazterketa historikoak, gizarte antolamendurako eredu
bertikalek, eta nola ez, jendartearen amerikanizazioak, indibidualismoak…
produkziora bideratutako haragi puskak izateak, animalia politiko izatetik
bereizi gaitu, eta kontzientzia komunitarioa hirugarren planora pasatu da gure
ardura-eskalan… Organu politikoen eta jendartearen arteko urrunketa handitu
egin da, eta arduradun politikoek deus gutti egin dute herritarra erabakien
partaide izateko…
Jarrera
sistematiko eta iraunkor honen emaitza, Batzarrea ia bitxikeria
erromantiko-folklorikoa bihurtzea izan da. Herritarra eta exekutiboaren arteko
zubia izan beharko lukeena, edo hobe, udal kudeaketaren iturri izan beharko
lukeena, balio praktiko eskaseko aztarna bihurtzea eragin du. XXI mendean
berritu diren Ordenantza hauetan, oraindik, Batzarrearen eta Herrietako
Alkate-Juratuen inguruan indefinizioa eta ardura espezifiko eza nabarmentzen
da. Mesfidantza eta ausardia falta direla-eta, ez da Batzarrea, Alkate-juratuak
eta Batzar Nagusia beren ahalmen eta aukera guziekin udal kudeaketaren
ezinbertzeko osagarri egiteko apostua egin.
3.- Oraingo egoeratik
abiatuta, norat abiatu beharko lirateke batzarreak? Zein litzateke etorkizuneko egoera ideala?
Herriek eta Baztanek osoki batzarreen bidez eta Batzar Nagusiaren bidez
funtzionatu lezakete?
Egiazko demokrazia dela iduritzen zaidan
neurrian funtzionatu dezakeela sinesten dut, baina hortarako prozesu luze bat
beharrezkoa dela ikusten dut, etengabea eta progresiboa, momentuoro egituraren
eraginkortasuna sendotu beharko duena.
Lehenik eta behin, baztandar guziei
jakinarazi behar zaie Baztanek duen berezitasun administratibo eta
organizatiboa, eta parte hartze zuzenak gure etorkizunerako duen garrantzia. Kultura aldaketa bultzatu behar da,
norbanakoan interes eta ardura komunitarioa sortzeko.
Batzarrea, udal
kudeaketarako bitarteko eraginkorra izan beharra da –herrietako beharren
identifikazio eta konponbiderako, udal aurrekontuen elaboraziorako iturri…- eta
hortan zer erran handia du udalak. Batzarreen eta Batzar Nagusiaren eraginkortasuna
ezin da egon momentuko korporazioaren borondatearen baitan, Baztango
instituzioen arteko harremana arautzeko Ordenantzak daude, eta hauek garatu
behar dira Udala, Batzar Nagusia eta Herrietako Batzarreen arteko
funtzionamendua artikulatzeko, udal kudeaketa parte hartzaile iraunkorra
osatzeko.
Afera partikularragoak direnetatik (ez dakit
ze pistako zuloak konpontzea, ez dakit nongo bankua jartzea, herriko landaketa
garbitzea, herriko ur edo hilerriko arazoak...) interes orokorragoetakoak diren
kontuetara (aurrekontuak, komunalen kudeaketa, baztandar guziei eragin
gaitzaketen erabakiak...), Herrietako Batzarreek eta Batzar Nagusiak zer erran
handia dute. Ez dira Baztandarroi berezi egiten gaituen produktu
historiko/apaingarriak, kontzientzia komunitarioa izanen duen jendartea
garatzeko egiazko tresnak baizik. Hauen lanketa, serioski hartu beharreko
ardura bat da, batez ere garai hauetan, lurralde honen etorkizuna bertatik
zizelkatu dadin, ekimen inportatuak nagusitu gabe.
Batzar Nagusiko kideen formazioa,
jendartearen heziketa, Ordenantzen eguneratzearen jarraipena, Herrietako Alkateendako
Zinegotzia… pausoz pauso egiteko lan aunitz dago, baina ziur nago Baztanek
sorpresa aunitz dituela emateko!
4.- Venezuelan egona
zara eta bertako Kontseilu Komunalen bidezko antolamendua ezagutzeko aukera
izan duzu. 2008an, halaber, Kontseilu Komunalen legea onartu zuten. Zer ikasi
daiteke bertatik, baldin eta zerbait ikasterik baldin badago?
Venezuelan egon ginelarik, Andeetako eskualde
bat osatzen zuten herri batzuk bisitatu genituen. Herri handienaren izenaz
oroitzen naiz: Mucuchíes. Kontseilu Komunalak (batzarreak) aintzat hartzen
zituen politikak etorri aitzinetik, eskualdea antolatu gabe zegoen eta egoera
penagarrian. Kontseilu Komunalen Legearen bidez, Andeetako biztanle hauek
aktibatu egin ziren, antolatu, gobernuak bertako Kontseilu Komunalari baliabide
ekonomikoak eman zizkion, beren burua antolatzeko irizpideak eta aholkularitza.
Horrela, arras denbora gutxian eskualdeko kutxa sortu zuten herritarrei mailegu
egokituak emateko, zerga sistema autonomo bat ezarri zuten, haur eta gazteen
hezkuntza bermatu, emakumeendako lana sortzeko landetxeak bultzatu zituzten
(Mucuposadak), nekazaritza indartzeko ureztatze sistema komunala eraiki zuten
auzolanean, hiriaren eskaerari erantzun aproposa emango zion harreman
komertziala landu zuten, herrien arteko garraio sistema antolatu... Bi urte
eskasetan Mucuchíes inguruko paisaia sozial eta ekonomikoa irauli egin zen
Kontseilu Komunalen bitartez. Lehenago gertatzen ez zen bezala, haien beharrak
identifikatuak eta asetuak izan ziren laguntza pixka batekin eta
autogobernuaren bidez. Nere lagun hiritarrek ez bezala, gure eskualdea
haienarekin alderatzen eta identifikatzen nuen eta ezin nuen berdintasunak
ikustea sahiestu… Itxaropena ematen zidan. Posiblea dela agerian zen.
Hori bai, ez dugu atzendu behar hura Venezuela
zela, eta gu Europa mendebaldean gaudela, haiekin alderatuta gibelapen demokratiko
izugarria omen dugu, eta arrazoi dute…
5.- Zer balorazio
egiten duzu berriki onartu diren Ordenantzei buruz? Elizondoko Herriko
batzarrak ezezko bozka ematea erabaki zuen…
Berriki onartu diren Ordenantzak gaur egun
dagoen egoera instituzionala isladatzera mugatu dira.
Herri Lurrak kudeatzeko gaia aunitz jorratu
da, eta emaitza, beharrezkoa zen araudi berritu bat da, dudarik gabe
baliogarria izanen dena. Baina, hala ere, Haraneko Antolakuntza Administratibo
berezia galtzera kondenatua utzi da. Ordenantzetan, dokumentu hau udal
kudeaketan parte hartzea indartzeko tresna baliogarria izan nahi duela
azpimarratzen bada ere, artikulatuan ez da asmo hau gauzatzen, izan ere, Baztango antolakuntza administratiboari
dagokionez, Alkate-juratuen eta Junteroen izendatze prozesua hobeki definitzen
da, Batzarreetan parte hartzeko behar diren baldintzak zehazten dira eta hauek
deitzeko eman beharreko pausuak finkatzen dira: dagoena zehazten da, baina
zegoena ez da garatzen. Ez da deus ere aitzinatzen.
Nire iritziz, kapitulu berri bat sortu
beharko litzateke, Baztango udalak Baztango bertze instituzioekin izan
beharreko harremana eta betebeharrak artikulatuko lituzkeena, eta nola ez,
udalerriaren kudeaketan parte hartzeko Alkate-Juratuak edukiko dituen eginbeharrak
definituko lituzkeena. Adibidez, herri bakoitzeko beharrak identifikatzeko obligazio
arautua sor zitekeen (ez dago), edota Batzar Nagusian onestea posible eginen
lukeen udal aurrekontuen konfekziorako pautak ezarri.
6.- Batzarre bidezko
antolamendua jatorrian eta historikoki jendarte komunalei dagokie, klase gabeko
jendarte berdinzaleei. Oraingo klase gizartean, interes kontrajarri eta
antagonikoak dauden gizartean, zein toki eduki dezakete Batzarreek?
Batzarrea, jendarte
antolaketarako arras tresna modernoa dela iduritzen zait, alternatiba indartsuena
eta akaso bakarra baita.
Ikuspuntu
orokor batetik begiratuz, gure gizartea eredu bertikalean antolatua dugu:
goitik behera markaturik heldu zaizkigu hartu beharreko jokamoldeak eta lehentasunak.
“Herritarren hitza ordezkatu” eta “herritarraren intereserako” lanean aritzea
oinarria duela dion klase politikoak hartzen ditu guri eraginen dizkiguten
erabakiak, modu paternalistan, gu ordezkatuz, gure gabeziak zeintzuk diren
identifikatzen jakinen ez bagenu bezala… baina han goian dagoen politikoa ez da
herritarraren interesak defendituko dituen ordezkari bat, kapital metatzaileen
zerbitzura bihurtu den figura bat baizik: estatuko presidentea, foru-komunitatekoa, alkatea… Guztiak sistemak
xurgaturiko elementuak dira, ia alternatibarik gabe sistemaren zerbitzura lan
egiteko tresnak bilakatuta daudenak. “Ezkertiarrak” direnak ere konbentzituak daude, pixkanaka-pixkanaka,
erreforma ttikien bitartez gizarte berdinzalea lortzeko bidea eginen dela,
ongizate maila handituko dela… Baina, gaur egun bereziki modu argigarrian
errealitateak hori gertatzen ari denik ez digu erakusten,: “katakrak”
meatxuaren bidez halako “shock doktrina” bat ezartzen da, honen bitartez gizartea
etengabeko espiralean sartzen ari da eta estatu-politikak langileria babestu
beharrean kapitalari laguntza ematen dio, espekulazioari hegalak ematen zaizkio…
egiazko agintaria kapitala baita. Herrietatik, herritarengandik abiatutako erabakiek
ez lukete hau gertatzen utziko.
Baztan ere mundu
honetan bizi denez, ondorio berdinak jasaten ditu. Adibidez, langabeziaren
kontrako ezinbertzeko botika gisa saldu nahi da Erdizko proiektua,
multinazional batek gure komunalean egin nahi duen 60Ha-ko harrobia, edo
zerutik eroritako salbazio gisa aurkezten zaigu Caixa Galiziak Aroztegia
inguruan egin nahi duen ekimen inmobiliarioa… Zer paper duten batzarreek guzti hontan? Hasteko,
kanpoko interesetatik nahiz interes partikularretatik heldu diren proiektu
erraldoi hauen aitzinena euspen pareta izan daitezke; oinezkoek, herritarrek,
ekimen hauen eragina beren larruetan sentituko dutenek, azken hitza,
gaitzespena edo onespena emateko izanen duten eremua da Batzarrea.
Baina ez hori bakarrik. Batzarre bidezko eraketa eta ondasun komunalak
eskutik dabiltza. Nekazal-Artzain jendarte historikoetan lurra oinarrizko produkzio
bitartekoa zen, lurra komunala zen, eta batzarre bidez kudeatzen zen. Baztanen,
uraren eta hilerrien erabilera gaur egun Batzarre bidez arautzen da, hauek
zerbitzuak dira, baina komunalen kontzeptua gaur egungo bertze esparruetara
hedatzeko saiakera egin daiteke, oraingo produkzio bitartekoetara adibidez; hauek
beharren araberako ekimenak lirateke, eta etekinak baleude interes komuna
izanen lukete onuradun, behar eta proiektu produktibo berriak elikatzeko eta
abar.
Prozesu baten
bidez, erabaki ahalmena eta gizartea antolatzeko esparrua batzarreen planora eramateak
herritarrari emanen lioke burujabetza, herriaren garapen natural bat ekarriko
luke. Ez dugu beldurrik eduki behar, gizarteak aitzinera joateko bidea
harrapatuko baitu beti.
7. Elizondoko alkate
gisa bigarren legealdia eginen duzu, orain artiokoaz zer azpimarratuko zenuke?
Elizondo bezalako 3000 biztanleko herri batek batzarre bidez funtzionatu
dezake? Ze egin beharko litzateke horretarako?
Orain artiokoa, aitzinetik aipatu dudan
ametsera ez da hurbildu ere egin, baina aldaketa kualitatibo batzuk eman direla
uste dut. Alde batetik, erreleboa. Oraintxe, ni eta 11 kargodun gazte eta
langile gaude Elizondon eta hauetarik denak edo gehienak elkartzen gara gutxienez
astean behin. Beti bada zerbait. Bertzalde, Herriko Etxeak kudeatzen dituen
afera desberdinak eguneratu ditugu, kontuak eramateko modua informatizatu da,
hilerriko gaiarekin berdin, etxesariaren problematika errebisatzen ari gara,
herriarendako baliabide berriak lortu dira egoera ekonomikoa hobetuz, eta nork
daki! Agian, laguntza gehixagorekin lana sortu edo produkzio bitartekoren bat
martxan jartzeko ahalmena izanen dugu noizbait! Azkenik, nabarmendu nahiko
nuke, gure jokabidea gizarte eragileekin, ahalik eta herritar gehienekin, ahal
bezain kolektibo gehienekin kontatzea izan dela, denek osatzen dugulako herria.
Herriko zati izatearen sentimentua bultzatzeari garrantzi handia eman zaio eta
emaitzak bistakoak dira, inplikazio maila haundia dagoela uste dut.
Espero dut, hemendik aitzinera Batzarreetan hartutako
erabakiek udaletxean isla izatea, batzarreei garrantzia eta sinisgarritasuna
emanen litzaieke, eta herritarren artean parte hartzeko gogoa piztuko litzatekeela
pentsatzen dut.
iruzkinik ez:
Argitaratu iruzkina