SOZIALISMOAREN ERAIKUNTZA
EUSKAL HERRIAN ETA XXI. MENDEAN
(15. Metaziri-n argitaratutako testua)
Joan den azaroan Sozialismoaren
eraikuntza Euskal Herrian eta XXI. Mendean izeneko solasaldia izan zen Elizondoko
Aizkunenean. Solasaldi hau ematerat Sabino Cuadra LAB sindikatuko kidea eta
ezkerreko militante historikoa etorri
zen. Ondoko lerrootan hitzaldi horretan errandakoaren laburpena eskaintzen
dizuegu.
Sabino Cuadraren solasaldia
aspaldi mundu osoan zabaldu zen lelo batekin hasi zen: bertzelako mundu bat posible da. Bertzelako mundu berri hori zertan oinarritu beharko
litzatekeen da gakoa, zeinek izanen liratekeen mundu berri horren zutabeak,
ardatzak… honetan guztian sozialismoa aipatzea nahitaezkoa da.
Lau
puntu garrantzitsu daude kontuan atxiki behar ditugunak sozialismoaren zutabeez
solastatzerako orduan:
1.-
Sozilismoa eta jabetza pribatua.
2.-
Sozialismoa eta demokrazia.
3.-
Sozialismoa eta natura.
4.-
Sozialismoa eta patriarkadua.
1.-
SOZILISMOA ETA JABETZA PRIBATUA
Sozialismoa
eta jabetza pribatua puntua azaltzerako orduan jakin beharreko datu batzuk
aipatzea komeni da, gaur egun mundua nork kontrolatzen duen ikusteko. Izan ere,
munduko ehun multinazional nagusiek kontrolatzen dute mundu osoan ekoizten den
produkzioaren laurdena; eta finantzaren munduan 100 enpresa horiek kontrolatzen
dute inbertsioen erdia.
Estatu
Espainolean orain urte bete BBVAko goi mailako zuzendari batek jubilazioa hartu
zuen 55 urterekin eta jubilazioarekin batera 70 milioi euro eman zizkioten kalte
ordain edo indemnizazio gisa. Zuzendari horren urteroko pentsioa 9 milioi
eurokoa den bitartean, munduan urtero 24 mila pertsona gosez hiltzen dira. Sinesgaitza
badirudi ere, honen guztiaren zergatia kapitalismoaren baitan dago.
Kapitalismoak
2 zutabe nagusi ditu: bata jabetza
pribatua eta bertzea irabazi asmoa. Bi zutabe hauek mugarik
gabeko oinarriak dira kapitalismoarendako. Konstituzio espainolak erraterako, jabetza
pribatuak funtzio soziala bete behar duela dio, baina ez da horrela gertatzen. Hortaz,
egunero milaka pertsona hiltzea bidezkoa da, guztiaren gainetik estatu eta
erakunde desberdinek lehenesten dutena jabetza pribatua delako. Jabetza
pribatua mugagabea izateagatik gertatzen da gertatzen dena.
Beti erran
izan da, guk aldarrikatzen dugun sozialismo horretan ekonomiaren antolakuntza
bertze ardatz desberdin baten inguruan kokatu behar dugula, eta ardatz hori jabetza
publikoa da. Jabetza publikoa erraterakoan ez dugu erraten Jabetza Publiko
hori Estatukoa izanen denik, Jabetza Publikoan Estatuko Jabetza sartzen den
gisa berean sartzen baita komunalen jabetza, Udalekoa, baita Jabetza soziala ere, langileen artean egina
edo ekoizle eta kontsumitzaileen artean sortzen diren sare horietan agertzen
dena; hori da jabetza publikoa, ez estatala soilik, estatala horren barne
egonen litzateke. Herriaren jabetza inporta zaigu, ez jabetza indibiduala.
Jabetza indibiduala publikoaren pean egonen da.
Anitzetan
aldarrikatzen dugu aberastasuna eta lana banatu behar direla, baina hori
egiteko batzuei dutena kendu egin behar zaie, batzuei anitz gainera; desjabetu
egin beharko dugu boteretsuek duten jabetza. Aberastasuna banatzeko norbaiti
kendu behar baitzaio. Historiak erakusten du boteretsuek desjabetza hori ez
dutela modu baketsuan onartuko, boteretsuek beraien esku dauden baliabide
guztiak erabiliko dituztelakoz hori gerta ez dadin: Estatua, polizia, giza
baliabideak…
2.- SOZIALISMOA ETA DEMOKRAZIA
Sozialismoaren puntu hau garatzeko Errusiar
Iraultzako sobieten demokrazia adibide aski argigarria da. Leninek eta marxista guzti-guztiek Estatua ez zela
erakunde neutroa erraten zuten, estatuko boterea noren esku zegoen horren araberakoa
izanen zela politika.
Herriak boterea
hartu bezain laster estatuko boterea desagertzen ere hasi beharko zela zioten.
Estatuak zuen boterea gizarterat pasatzen hasi, zeren botere hori lapurketa bat
izan zen bere momentuan, gizarteari ebatsitako boterea. Estatuko boterea eta
estatua bera desegiten hasi eta gizarteari itzuli botere hori.
Baina zer
gertatu zen? Iraultzan eta urte anitzen zehar gizartean sortutako antolakuntza,
langileek egina, herritarrek egina… estaturat pasatu zela. Gizartean zegoen
antolakuntza poliki-poliki desagertu zen, eta estatuan sartu ziren politiko,
sindikalista eta abarrak burokrata bihurtu ziren. Horren ondorioz gizartearen
gainean burokrazia agertu zen. Errusian zegoen sozialismo erreal hori erori
zelarik, egun batetik bertzerat kapitalista bihurtu ziren. Sozialismo hori
edukirik gabeko sistema bat zen, hain ona bazen zergatik ez zen erorketa horren
kontra jendea borrokatu? Gizartean antolakuntzarik ez zegoelakoz eta antolakuntza guzti hori Estatuarekin
batera bat egin zelakoz.
Hortaz
arras inportantea da demokraziaren kontua eraiki nahi dugun sozialismo
horretan, kontua ez baita bakar-bakarrik ekonomia zentralizatua, planifikatua… demokraziarik
ez badago sozialismorik ez dago. Demokraziaz solastatzea ez baita bakarrik hauteskundeez
solastatzea. Demokrazia leku guztietarat eraman behar da: lantegietarat, auzoetarat, familietarat,
harremanetarat… eta baita noizbehinka hauteskundeetarat ere.
Ez da
erran behar gaur dugun demokrazia hemen, demokraziarik eza dela. Ilegalizazioak
sortzen direlarik demokraziarik ez dago, eta erabaki guztiak kasakriston,
burtsan hartzen direlarik, demokraziarik ez dago. Hemen herriak ez du erabakitzen
ahal bihar edo etzi izanen dugun ekonomia egoera. Horrelako erabakirik ez badira hartzen ahal demokraziarik ez dago,
demokrazia ez baita bakar-bakarrik ordezkariak aukeratzeko kontu bat.
Anitzetan
gertatzen da, udal hauskundeetarako zerrendak egiterako orduan, edo foru
parlamenturako zerrendak egiterako orduan, pertsona onenak ezartzen ditugula
horretan eta herri antolakuntza erdi hutsik gelditzen dela, jenderik gabe. Hori
akats handia da Estatuak gure antolakuntza, gure jendea… irentsi egiten baititu
gisa horretan, eta gu gelditzen gara
kanpoan antolakuntzarik gabe, pertsonarik gabe, instituzioetan gelditzen
delakoz jende hori. Kontrakoa egin beharko genuke. Instituzioetan parte hartzea
inportantea da, horretan jende baliotsua sartzea, baina batez ere,
inportanteena herrigintzan egiten dena da, herri antolakuntzan, gure taldeak
gorpuztu, hori da inportanteena.
3.-
SOZIALISMOA ETA NATURA
Denok
dakigu natura eta baliabideak mugatuak direla, eta dugun erritmoarekin, naturak
duen erritmoa gainditzen ari garela erraten ahal da. Natura ez baita ustiatzeko
kontu bat, berarekin batera joateko zerbait baizik.
Ekonomilariek
erraten digute -sistemako ekonomilariek- krisitik ateratzeko zegoen hazkunde
tasa berreskuratu behar dugula, eta gutienez ehuneko hirukoa izan behar duela
hazkunde horrek. Baina kontuak ateratzen baditugu konturatzen gara tasa horrekin segitzen badugu munduko
produkzioa bikoiztuko dela: kotxe kopurua bikoiztuko dela, elektrodomestikoen
kopurua bikoiztuko dela, nekazaritzan oro har produzitzen dena bikoiztuko dela…
gauza guztiak bikoiztuko direla, baina naturan ez dago horrelakorik. Ez dugu planteatzen
ahal irtenbidea tasa hori berreskuratzea
denik, kontrakoa baizik. Apustua aberastasunaren banaketan egin behar dugu, ez
aberastasunaren hazkundean. Horretan dago arazoa.
Bistakoa
da gaur egungo krisia gainprodukzio krisia dela. Gure lantegi, biltoki eta
abarrak produktoz beterik daude, enpresek duten produkzio ahalmena gizarteak dituen
beharrak betetzekoa baino aise handiago da. Kapitalismoak egiten duena ez baita
gizarteak behar duena ekoiztea etekinak ematen dizkion hori ekoizten du. Edonork
enpresa bat sortzen badu ez da izanen, “pobrezian bizi den jende anitz dago,
beraiendako zerbait egin behar da” ez; pobreek ez baitute erosteko ahalmenik. Enpresa
sortu duen horren helburua etekinak lortzea izanen da. Hori dela eta eraiki
nahi dugun gizarte horretan beharrezkoa da baloreak arrontean aldatzea. Orain arte baliabideak eta dirua paratu izan
dira kotxe gehiago erosteko, kotxe gehiago fabrikatzeko, elektrodomestiko
gehiago fabrikatzeko… hori da aldatu behar duguna. Osasun zentro gehiago, hezkuntza
zentro gehiago dira behar ditugunak. Produkzio
gehiago egiteko aurrerapen teknologiko bat aurkitzen badugu, ez dugu erabili
behar produkzio gehiago egiteko, ordutegia murrizteko baizik, hobe baita fabriketako
laneko erritmoa moteltzea produkzioa handitzea baino.
Erran
bezala, gaurko krisia gainprodukzio krisia da, eta ez gara hortik aterako gauza
gehiago produzituz. Baloreak erabat aldatu behar ditugu. Mezu hau gizartean
sartzea zaila da zeren barruraino dugu kontrako mezua. Urteak eta urteak baitaramatza
sistemak kontrakoak erraten: kontsumoan dago zoriontasuna.
4.-
SOZIALISMOA ETA PATRIARKATUA
Laugarren
puntu honetan bi gai aztertzea komeni da: bata lana eta bertzea familia. Bi
zutabe horietan oinarritzen delakoz emaztekien zapalkuntza. Gaur egungo
gizartean lan mota anitz baldin baditugu ere batez ere bi lan mota dira
aipatzekoak: bata lan produktikoa eta bertzea erreproduktiboa.
Lan produktiboa fabriketan, zerbitzutan egiten dena da. Lan produktibo hori
egiteagatik abantaila eta eskubide anitz sortzen dira, lan hori egiteagatik
konbenioetan agertzen den soldata jasotzen da, gizarte segurantzan sartuta
nago, eta horrekin batera eskubide sozial dexente lortzen dira, langabezian
geldituz gero kobratzeko eskubidea, adin
batera ailegatuta erretiroa. Lan hori egiteagatik gizarteak hainbat abantaila,
eskubide ematen ditu; eskaxak, baina eskubideak.
Bertze
lana egiten badugu, lan erreproduktiboa alegia, ez dugu eskubiderik izanen.
Lehenbiziko lana bezain inportantea da lan hau, baina hemendik ez dira
eskubideak sortzen, lan hori egiteagatik ez baikara gizarte segurantzan sartzen,
soldatarik ez, eta 65 urte betetzera ailegatuta pentsiorik ez. Aipatu bi lan
desberdin hauek, bata zein bertzea, arras inportanteak dira gizarteak aitzinerat
egiteko, hortaz, bertze gizarte berri bat nahi badugu hori erabat aldatu behar
dugu.
Bigarren
zutabea familia sistema da. Kasu anitzetan emaztekiek lortzen dituzten
eskubideak edo abantailak ez dituzte lortzen pertsonak izateagatik, gizon baten
emazte izateagatik baizik. Emazteki batzuk gizarte segurantzako eskubide batzuk
senarraren kartillan egoteagatik lortzen dute, alargun pentsioa senarra
langilea izan zelakoz lortzen dute, baina emazteki horiek langileak izan dira.
Bakar-bakarrik langile izateagatik, etxeko lanak egiteagatik, zaintza lanak
egiteagatik… ez dute deus lortzen.
Aipatu
bi ardatz hauen inguruan oinarritzen da
gaur egun emaztekien zapalkuntza. Bi kontu horiek aldatzea beharrezkoa da pertsonen
arteko harremanak libreagoak izateko, eskubideak pertsona izateagatik
edukitzeko, eta ez gizonki baten emaztea izateagatik. Eskubide horiek
unibertsalak izan beharko lukete pertsonak izateagatik, adin batera
ailegatzeagatik… Berdin langile produktibo izan edo langile erreproduktiboa
izan.
SOZIALISMOA
ETA EUSKAL HERRIA
Sozialismoa
neurri handi batean demokrazia da, erabateko demokrazia, demokrazia sakona. Lortu
nahi dugun sozialismo horrek askatasun eta eskubide guztiak betetzen ez baditu,
ez dago sozialismorik. Eskubide eta askatasun horien guztien barnean eskubide
eta askatasun nazionalak daude, eta
horiek ere ez baditu betetzen sozialismorik ez da egonen.
Orain
dela mende bat, irlandar iraultzaile batek, James Connollyk, erraten zuen
langileria zela eskubide nazionalak eta independentzia azken muturreraino eramateko gai
zen klase bakarra. Arrazoia sinplea zen: langileek borroka hori egitean ez
zuten galtzekorik, kapitalistek eta boteretsuek bai berriz. Josu Jon Imazek erraterako,
badu galtzerik, orain Petronorreko zuzendari eta Repsoleko buruzagi inportantea
da eta egoera horretan egoteagatik, estatuko boteretsu batzukin harreman estuak
ditu eta multinazional anitzekin ere harreman estuak ditu; horregatik ez dago independentzia
lortzean interesatua, nahiz noizbehinka –Aberri Egun batean- erran
independentziaren aldekoa dela. Errealitatean
bere interesak eta langileenak, herritarrenak, bide desberdinetatik doaz, hortaz,
independentziaren aldekoagoak dira herritarrak, langileak, boteretsuak baino.
Historian
zehar herri batzuetan egin diren iraultzak eta eraiki den sozialismoa ikusten
badugu, ohartuko gara erabilitako bideak desberdinak izan direla: Errusian,
Txinatan, Kuban… herri bakoitzean bide propioa egin zuten. Euskal Herrian ere
gure lana da gure bide propioa aurkitzea. Sozialismoa da gure helburua, hori
lortzeko herriz herriko politika egin behar da, bide propioa aurkitu behar
dugu, gure ezaugarrietan oinarrituta, Errusian, Txinan eta Kuban egin zen
bezala. Ikasi behar dugu Hego Amerikan egiten ari direnaz, baina batez ere
irakaspen horiek bereganatu ondoren, gureak eraiki behar ditugu. Gure bide hori
irekitzeko parametro espezifikoak ditugu Euskal Herrian, batzuk abantailak,
bertze batzuk ez hainbertze.
Gure kasuan
aipagarria den ezaugarrietako bat bortz mendetako zapalkuntza jasan dugula eta
jasaten ari garela da. Eskarmentu handiko herria da gurea, eta garbi dugu
elkartasunezko harremanak izateko lehenik gutienez independentzia behar dugula.
Bortz mendetako zapalkuntza hori jasan ondoren baieztatzen ahal dugu
independentzia dela bide bakarra, kapitalismoak eta historiak kendu dizkiguten
gauza horiek guztiak berreskuratzeko: herri boterea, ohitura desberdinak,
produkzioa antolatzeko ohitura desberdinak… gure parametro desberdinen artean
agertzen dira bi estatutan banatuak
izatea, tamalez zailtasun handiagoak jartzen dizkigu horrek, planteamendu
amankomun bat egiteko… guk ere baditugu tradiziozko erakundeak eta ohiturak, erdi
galduak daudenak, agian txiki xamar izan daitezkeenak, baina inportanteak:
batzarreak, auzolanak… zabal daitezke gizartera horrelako ohiturak, ekonomia
eta gauza anitz modu desberdin batez antolatzeko. Denon arteko kontua da,
pentsatzea gure bide propio hori nondik eraman, zer aprobetxatu, zer indartu,
zer baztertu… hau dena gure lana da, ez bertzeena.
Gure
politika bi aldeetako politika da: aldaketa soziala eta askapen nazionala.
Bi alde horietarat jo behar dugu gure proiektua aitzinerat ateratzeko, gizarte
berri bat lortzeko.
iruzkinik ez:
Argitaratu iruzkina